Облыс орталығындағы Оралхан Бөкей атындағы қалалық кітапханада «Жазушының сөзі – өмірдің өзі» тақырыбымен  жазушы, ұстаз Айзат Рақышпен кездесу өтті.

Кездесуде студент жастармен қатар, жазушының құрбылары, шығармаларын сүйіп оқитын тұрақты оқырмандары да келіп қатысты, деп хабарлайды Altaynews тілшісі.

Кеш барысында қатысушылар Айзат Рақыштың шығармалары бойынша қойылған тест сұрақтарына жауап беріп, өздерін толғандырған сан сауалға жауап алды. Жазушы да әдебиетке бет бұрған жылдары туралы естеліктерімен бөлісті.

Жазушы-жерлесіміз бұл кешке де құр қол келмей, өзінің оқырмандары үшін сүйінші жаңалығын арқалап келген. Арадағы ұзақ үзілістен соң туған жеріне келерде ерекше шабыттанған ол «Көз байланғанда» атты тұңғыш көлемді шығармасын жазыпты.

Ерекше форматта өткен кездесуде жиналғандар Айзат Рақышты тек жазушы деп қана емес, ақындық, әншілік қырынан да таныды.