Түркістан облысында Дарбаза-Мақтаарал теміржол желісінің құрылысы басталды.

ҚР Премьер-министрінің баспасөз қызметінің ақпаратына сүйенсек, ұзындығы 152 шақырым болатын теміржол желісі Қазақстан мен Өзбекстанды жаңа шекара өткелі арқылы байланыстырады, деп хабарлайды Altaynews.kz сайты.

Еліміздің Премьер-министрі Әлихан Смайылов құрылыс жұмыстарының ресми түрде басталғандығын телекөпір кезінде жариялады.

Бұл еліміз үшін өте маңызды жоба. Өйткені, жаңа теміржол желісінің құрылысы қолданыстағы Сарыағаш-Ташкент учаскесіндегі жүктерді жаңа тармаққа бағыттауға, сол арқылы Сарыағаш станциясының жүктемесін азайтып, жалпы Өзбекстан бағытындағы экспорттық тасымалдарды ұлғайтуға мүмкіндік береді.

Еліміздің көліктік әлеуетін дамыту мақсатындағы бұл жобаның нәтижесінде Қазақстан-Өзбекстан мемлекеттік шекарасы арқылы жаңа өткізу пункті ашылады.