Елімізде «Заң мен Тәртіп» атты республикалық ақпараттық-түсіндіру апталығы өтті, деп хабарлайды Altainews.kz тілшісі.

Шара барысында сыбайлас жемқорлыққа қарсы қызмет, прокуратура, полиция, қаржылық мониторинг органдары мен әкімдіктер бірлесіп, азаматтарды қабылдап, құқықтық кеңес берді. Кездесулер ірі сауда орталықтарында, ХҚКО-ларда, сондай-ақ шалғай және қатынауы қиын ауылдық елді мекендерде ұйымдастырылды.

Апталықтың негізгі мақсаты – халыққа заңнама талаптарын түсіндіру, мемлекеттік қызметтерді алу тәртібі туралы ақпарат беру және азаматтарды толғандырып отырған жүйелі мәселелерді анықтау болды.

Бір апта ішінде құқық қорғау органдары 8 мыңға жуық адамды қабылдап, түрлі мазмұндағы өтініштерді қарады. Азаматтар жер қатынастары, тұрғын үй, әлеуметтік төлемдер, балалар қауіпсіздігі, кәсіпкерлік құқықтарын қорғау сияқты тақырыптар бойынша кеңес алды.