Ұзындығы 316 шақырымға созылатын туристік бағыт ШҚО-ның Марқакөл көлі мен Қытайдағы Канасты жалғайды, деп хабарлайды Altainews.kz тілшісі.

Болашақта дамыту жоспарланған ШҚО мен Қытай арасындағы трансшекаралық туристік бағыт туралы Мемлекет басшысының төрағалығымен өткен жиында облыс басшысы Ермек Көшербаев айтты.

ҚХР-дағы «Қазақстандағы туризм жылы» аясында ШҚО делегациясы Бейжіңдегі ірі туристік форумға қатысты. Бұл жерде шығысқазақстандықтар қытай бизнесмендері мен туристік операторларға облыстың туристік әлеуетін кеңінен танытты.

ШҚО әкімінің сөзіне сүйенсек, ҚХР-дағы серіктестермен бірге ШҚО-ның Марқакөл көлі мен Қытайдағы Канасты жалғайтын трансшекаралық туристік бағыт жобасы бойынша қарқынды жұмыстар жүргізілуде.

Бұл туристік бағыт келушілерге бірден Марқакөл көлін, Ескі Австрия жолын көріп, «Берел» қорық-мұражайына баруға мүмкіндік бермек.