«Ауыл» партиясы атынан сайланған Қазақстан Республикасы Парламенті Мәжілісінің депутаты Аян Зейнуллин Шығыс Қазақстан облысы Глубокое ауданының Солнечное ауылындағы «Майлы дақылдар тәжірибелік шаруашылығы» ЖШС ұжымымен, партия белсенділерімен және барлық деңгейдегі мәслихат депутаттарымен кездесті.

Мәжілісмен депутаттардың заңнамалық жұмысына егжей-тегжейлі тоқталып, өткен кезеңнің қорытындысын шығарды, деп хабарлайды Altainews kz тілшісі.

Халық қалаулысы жиналғандар назарын «Агробанк туралы» және «Қазақстан Республикасының азық-түлік қауіпсіздігі туралы» заң жобаларына аударды. 

Қарастырылған екі бағыт ауылдық аумақтарда қызметін жүзеге асыратын ауыл шаруашылығы тауарын өндірушілер мен кәсіпкерлік субъектілеріне қызмет көрсетуге уәкілетті мамандандырылған салалық банкті құруды және ішкі агроазық-түлік нарығын қамтамасыз етуді, оның ішінде ауыл шаруашылығы өнімін және оны түбегейлі өңдейтін отандық өндірушілерді қолдау жолымен тиісті жағдай жасауды көздейді.

Депутат кездесуге қатысушылар тарапынан қойылған сұрақтарға жауап беріп, ұсыныстарды тыңдады.

Қазақстанда «Агробанк» тақырыбының биік мінберден көтеріліп жүргеніне он жылдан астам уақыт өтті. Агросаланы тиімді несиемен қамтамасыз етіп, ауыл шаруашылығын өркендетуге бірден-бір ықпал етеді делініп отырған «Агробанк» құрыла ма, жоқ па?

Фото: Аяужан Утеулинова