2025 жылғы 8 қаңтарда таңғы 04:00-ден бастап Өскемен қаласындағы Әміре Қашаубаев, Астана, Космический көшелерінде және Назарбаев даңғылында орналасқан тұрғын үйлер мен ұйымдарға жылу беру уақытша тоқтатылады, деп хабарлайды Altainews.kz тілшісі.

«Шығыс жылу» АҚ мәлімдеуінше, бұл уақытша тоқтату жылу желісіндегі ақауды жоюға байланысты.

Аталған учаске 3015 абонентті қамтиды, олардың ішінде 2842-сі – жеке тұлғалар, ал 173-і – заңды тұлғалар.

Мәселені шешу үшін 16 маман мен 4 техника бірлігі жұмылдырылған. Жұмыстар тәулік бойы жүргізіліп, жылу беруді мүмкіндігінше тезірек қалпына келтіру көзделуде.

«Шығыс жылу» АҚ басшылығы уақытша қолайсыздықтар үшін кешірім сұрап, тұрғындарға түсіністік танытқандары үшін алғыс білдіреді. Барлық сұрақтар бойынша компанияның диспетчерлік қызметіне хабарласуға болады.