Биыл Күршім ауылының тұрғындары қыста көмір жағудан біртіндеп бас тартып, орталық жылу жүйесіне өтпек. Бұған дейін көмірдің бір тоннасы 32 мыңнан 38 мың теңгеге дейін көтеріліп, ауыл тұрғындарының қалтасына айтарлықтай салмақ түсіріп келген. Ал биылғы жылыту маусымында кемінде 60-тан астам жер үй орталықтандырылған жылуға қосылады деп күтілуде, деп хабарлайды Altainews.kz тілшісі.

Қазір ауылдағы төрт қазандықтың екеуінде жаңғырту жұмыстары қарқынды жүріп жатыр. Бұрынғы әкімдікке қарасты қазандықтан бастап, негізгі көшелер бойымен ұзындығы 1200 метр болатын жылу құбырлары тартылуда. Бұл №1 мектеп, мәдениет үйі және орталық көшелердегі тұрғын үйлерді жылумен қамтуға мүмкіндік береді.

Қазірдің өзінде Күршім ауылындағы 36 көппәтерлі үйдің 9-ы орталық жылуға қосылған. Алдағы жылдары қалған көпқабатты үйлерді де біртіндеп жылу жүйесіне қосу жоспарланған.

Көмірдің орнына – тұрақты жылу. Күршімде қолға алынған бұл жоба – ауылдағы тұрғындардың тұрмысын жеңілдетуге бағытталған маңызды қадам. Тек құбыр тарту емес, бұл – ауыл өмірінің сапасын арттыру жолындағы нақты нәтиже.

Фото: Жәнібек Ырысбай