Күршім ауданында 8 көпқабатты үй орталықтандырылған жылу жүйесіне қосылды
Өткен жылы аудан тұрғындарымен кездесуде көппәтерлі тұрғын үйлер мен әлеуметтік нысандарды орталықтандырылған жылу жүйесіне қосу мәселесі көтерілген болатын. Бүгінде орталықтандырылған жылу жүйесіне 8 көпқабатты үй (584 пәтердің 170-і) мен 8 әлеуметтік нысан (25-тің ішінен) қосылған, деп хабарлайды Altainews.kz тілшісі.
— Бұл өте маңызды мәселе. Өңірдегі аудандардың көпшілігінде көпқабатты үйлер әлі де пешпен жылытылады. Жастар үшін бұл қиын болмауы мүмкін, бірақ зейнеткерлік жастағы адамдарға көмірді екінші қабатқа тасу өте ауыр. Сондықтан біз көпқабатты үйлерді орталық жылу жүйесіне кезең-кезеңімен қосу мәселесін шешудеміз, — деді ШҚО әкімі Ермек Көшербаев Күршім ауданының тұрғындарымен кездесуде.
Аудандағы жылу жүйесін жақсарту мақсатында жылу желілері мен қазандықтарды жаңғырту бойынша төрт ірі жоба жүзеге асырылуда. Оның біреуі аяқталған, қалған үшеуі 2025 жылға дейін аяқталмақ.
Сондай-ақ жылумен үздіксіз қамтамасыз ету үшін биыл облыстық бюджеттен «Күршім» КМК-ға көмір сатып алуға 67,4 миллион теңге бөлінді.
Арайлым Орсаринова
Фото: Нелли Петенева
Оқи отырыңыз
