18 қыркүйек күні еліміздің Көлік вице-министрі Талғат Ластаев Защита шағын ауданындағы «Өскемен-1» теміржол вокзалына барып, онда жүргізіліп жатқан жаңғырту жұмыстарының барысымен танысты, деп хабарлайды Altainews.kz тілшісі.

Жаңғырту аяқталған соң вокзал ғимараты айтарлықтай кеңейіп, барлық заманауи талаптарға сай болмақ. Бұрынғы ғимарат ескіріп, қазіргі нормативтерге сәйкес келмегендіктен, нысанның бір бөлігін бұзып, толық реконструкция жүргізу туралы шешім қабылданған.

Қыста қауіпсіздікті арттыру үшін бұрын сыртта орналасқан баспалдақ ғимарат ішіне ауыстырылды.

Жаңартылған вокзалдың бірінші және екінші қабатында күту залдары мен санитарлық тораптар орналасады. Сондай-ақ балалармен келетін жолаушыларға арналған аумақтар, күту бөлмесі, лифт, ана мен бала бөлмесі болады. Вокзал мүмкіндігі шектеулі жандардың да қажеттіліктеріне бейімделеді.
Қазіргі кезде барлық жұмыс жоспарға сай жүріп жатыр, айтарлықтай кідіріс немесе мәселе жоқ.

Көлік вице-министрі Талғат Ластаев жұмыстардың барысымен танысып, құрылыс жолаушыларға қолайсыздық туғызбауға тиіс екенін атап өтті.

Вокзал өкілдері жолаушыларды орналастыруда еш қиындық болмайтынын жеткізді.

Елизавета Седых
Фото: Жібек Нұрахмет
Видео: Жалғас Сақадиев