KZ
Өскемен
+15°
облачно с прояснениями жел 1 м/с, С
459.75 494.14 5.54

Кезекте тұрған 50 отбасына баспана кілті табысталмақ

Фото: Редакция мұрағатынан

10.06.2024, 09:09 300 Қызырбек Дүргінбайұлы

Өскемендегі 28-ші шағын ауданда құрылысы аяқталған 50 тұрғын үйдің кілті баспанаға мұқтаж отбасыларға табысталады.

Жаңа қоныс иелері қала әкімдігінің өкілдерімен бірге салынған тұрғын үйлерді аралап, сапасын көріп қайтқан болатын, деп хабарлайды Altainews.kz тілшісі.

Аталған шағын ауданда салынып жатқан бір қабатты жер үйлер көпбалалы және әлеуметтік аз қамтылған отбасыларға беріледі.

- Біз үй кезегіндегі тұрғындармен бірге 28-ші шағын аудандағы салынып біткен үйлерді көріп қайттық. Құрылыс сапасы тұрғындардың көңілінен шықты. Маусымның 14-і күні комиссияның отырысы өтіп, үй кезегіндегі алғашқы 50 отбасына баспана кілттері берілетін болады. Дайын үйлердің 38-і көпбалалы отбасына, 10-ы жетім балаларға және екеуі әлеуметтік аз қамтылған отбасына беріледі. Кезегі келіп тұрса да бұл үйлерден бас тартқан кісілер болды. Олар көпқабатты үйлерден баспана алғысы келетіндіктерін айтты, - дейді Өскемен қалалық тұрғын үй коммуналдық шаруашылық бөлімінің басшысы Амантай Бақыт.

Он сотық жері бар, ауданы 85 шаршы метр болатын үш бөлмелі жер үйлердің ауласына гараж, отын-көмір сақтайтын қоражай салуға және бау-бақша егуге рұқсат.

- Көпбалалы анамын, бес балам бар. Үй кезегінде 45-ші болып тұрған едім. Жаңа салынған үйлерді көруге шақырған соң барып қайттым. Үйлердің бөлмесі, сапасы бәрі көңілден шықты. Енді комиссия отырысы өткен соң үйдің кілтін беретін болды, - дейді көпбалалы ана Гүлзат Сағымжанова.

Айта кетейік, 28-ші шағын ауданға енді 256-шы маршрут автобусы тұрақты жүріп тұр. Осылай жаңа шағын ауданнан қалаға қатынау мәселесі де шешілген.

Біздің Instagram парақшамызға жазылыңыз

Жаңалықтарды ең бірінші болып оқыңыз

жазылу
Кликните на изображение чтобы обновить код, если он неразборчив