Үкімет отырысы барысында Премьер-министр Олжас Бектенов «Самұрық-Қазына» қорына қаңтар айының соңына дейін Өскемен, Көкшетау және Семей қалаларында жылу электр орталықтарын салу жобаларын іске асыру бойынша келісімшарт жасауды тапсырды, деп хабарлайды Altainews.kz тілшісі.

Еске саламыз, Қазақстан Президенті Ұлттық құрылтайдың V отырысында атом электр станцияларының құрылысы аяқталғанын күтпей, жаңа энергетикалық қуат көздерін іске қосу қажеттігін атап өткен болатын. Осыған орай өзін-өзі энергетикалық қамтамасыз ету мәселелері мемлекеттік саясаттың ең маңызды бағыттарының бірі ретінде қарастырылуға тиіс. 

Мемлекет басшысы Құрылтайға жиналған жұртшылық назарын елдің стратегиялық, бәсекеге қабілетті артықшылықтарына аударды. Президенттің айтуынша, Қазақстан әлеуетін айқындайтын маңызды мүмкіндіктердің бірқатары әрі толық көлемде іске асырылмай отыр. 

Атап айтқанда, елдегі көмір қоры орасан зор – шамамен 33 миллиард тонна. Қазіргі тұтыну деңгейін ескерсек, бұл қор 300 жылға жетеді. Жыл сайынғы көмір өндіру көлемі 110 миллион тоннадан асады және бұл елімізді әлемдегі алдыңғы қатарлы мемлекеттердің қатарына шығарып отыр.

Бүгін ҚР Энергетика министрі Үкімет отырысында көмір генерациясын дамытуға арналған Ұлттық жобаны әзірлеуге кіріскенін баяндады.

Жалпы қуаты шамамен 7,6 ГВт-ты құрайтын көмір генерациясы жобаларын жоспарға енгізу көзделіп отыр. Бұл ретте экологиялық заңнама талаптарын қатаң сақтай отырып, «таза көмір» технологиялары негізіндегі көмір генерациясы жобаларына айрықша басымдық берілмек.

Премьер-министр Олжас Бектенов Үкімет отырысын бірқатар нақты тапсырмамен қорытындылады. Өскемен қаласында ЖЭО салу жобасына қатысты Үкімет басшысы келісімшарт жасау талабын қойып, қатаң ұстанымын білдірді.

Марат Усманов 

Аударған: Айдос Мырзахметов 

Фото: ҚР Үкіметі