ШҚО мен Абай облысының нейрохирургтері тәжірбие алмасты
Фото: inbusiness.kz
ШҚО мамандандырылған орталығының инновациялық медицина бөлімшесі дәрігерлері алғаш рет Абай облысында мастер-класс өткізді.
Шығысқазақстандық мамандар екі күн бойы тікелей операциялар кезінде көрші облыстағы әріптестеріне дәріс оқып, өз тәжірибелерімен бөлісті, деп хабарлайды Altaynews тілшісі.
Мастер-класс аясында инновациялық медицина бөлімшесінің меңгерушісі, нейрохирург, PHD докторы Жандос Уаптың басшылығымен Абай облысының он тұрғынына жоғары технологиялық операция жасалды.
- Абай облысында алғаш рет пациентке жұлынға нейростимулятор имплантацияланды, осылайша айқын созылмалы ауырсыну синдромы тоқтатылды. Сондай-ақ, мастер-класс барысында жұлынға тоғыз күрделі эндоваскулярлық операция жасалды, олардың арасында Вада тестімен мидың қатерлі ісігін эмболизациялау жүргізілді. Бұл тест операциядан кейінгі функционалдық бұзылуларды болжау үшін нейрохирургиялық араласуды жоспарлау барысында қолданылады. Жергілікті мамандар жұлынға мұндай операцияларды бұған дейін өз беттерімен жасамаған көрінеді, - дейді ШҚО денсаулық сақтау басқармасының баспасөз қызметі.
Айта кетейік, өскемендік дәрігерлер тобы университет госпиталінің техникалық мүмкіндіктерінің жоғары екенін, осындай күрделі операцияларды жасау үшін заманауи жабдықтармен толық жарақтандырылғанын атап өтті.
- Шығыс Қазақстанда да бұл операция түрлері өңір тұрғындарына қолжетімді. Ол үшін клиникада жабдықтар да, кадрлар да жеткілікті. Бұл мәселеде әлеуметтік медициналық сақтандыру қоры тарапынан қаржыландыруға назар аудару қажет, дейді Жандос Уап.
Оқи отырыңыз
