Риддерлік балуандар еркін күрестен Қарағанды қаласында өткен ел біріншілігінде тамаша өнер көрсетті. Бұл жөнінде Риддер қаласы әкімінің баспасөз қызметі хабарлайды.

Айта кетейік, бес күнге созылған байрақты бәсекеге 2004-2005 жылдары туған, еліміздің түкпір-түкпірінен жиналған 600-ден астам спортшы қатысты. Осынау республикалық жарыста облыс намысын риддерлік төрт балуан қорғаған болатын. Олар: Әли Райханов, Егор Анчугин, Дәурен Сүлейменов пен Кирилл Ардалионов.
Тартысты өткен белдесулер нәтижесінде 52 келіге дейінгі салмақта сынға түскен Егор Анчугин қарсылас шыдатпай, ел чемпионы атанса, Кирилл Ардалионов (44 келіге дейінгі салмақ) доданың күміс жүлдесіне ие болды.

Бір айта кетерлігі, жерлестерімізді даңқты балуан Лондон Олимпиадасының қола жүлдегері Ақжүрек Таңатаровтың өзі марапаттады.