Риддерде ұрлықтан сақтану мақсатында дүкен мен ломбардтарға қойылған камералардың өзі қолды болып жатыр, деп хабарлайды Алтайньюс тілшісі. Бұл туралы Риддер қалалық соты мәлімдеді.

С. есімді жігітті ұрлыққа әлдекімдер итермеледі деп айтуға негіз жоқ. Жынды судың «құдыреті» болуы мүмкін.

Ол айсыз түндердің бірінде қаладағы әлдебір дүкеннің маңдайшасындағы камераны тағанынан ажыратып, сөмкеге тоғытады. Жол-жөнекей тағы бір дүкеннің «қырағы көзін» «ойып» алады.

Осыдан кейін бөтелкелестеріне қосылып, ішуді жалғастырады екен.

Сонымен тағы бір түні ол Қазпошта мен ломбардтың да маңдайшасындағы камераларды шешіп алып кетеді.
Мәліметке сүйенсек, күдікті зардап шегуші тараптарға 230 мың теңге шығын келтіріпті. Ол енді жазасын екі жарым жыл түрмеде өтейді, сондай-ақ 250 сағат жұмысқа жегіліп, 50 мың теңге айыппұл төлейді.

Айта кетейік, соттың бұл шешімі заңды күшіне әлі енген жоқ.