Еліміздегі белгілі айтыскер ақын Ринат Заитов кеше заңсыз ұйымдастырылған митингке қатысқаны үшін қамауға алынды, деп хабарлайды Алтайньюс тілшісі.

Бұл туралы Алматы қаласының полиция департаментінің баспасөз қызметі мәлімдеді.

Департамент мәліметінше, Ринат Заитов қаланың Алатау ауданында заңсыз ұйымдастырылған митингке қатысқан, осы әрекеті үшін қамауға алынған және түсіндіру жұмыстарынан соң босатылып, үйіне жіберілген.

Алайда біршама уақыт өткен соң Департаменттің ғимаратының алдында Заитовпен кездесуді талап еткен бір топ азаматтар жиналады. Полицияның мәліметінше, айтыскердің үйіне жіберілгенінен хабардар болса да, жиналған топ бірден тарап кетпеген. Жағдайды ушықтырмау үшін полиция қызметкерлері Заитовты қайтадан департаменттің ғимаратына алып келді.

-Ринат Заитов жиналғандарды заң бұзбауға шақырып, құқық қорғау органдарының заңды талаптарын орындауға шақырды, - деп мәлімдеді полицияның баспасөз қызметі.

Қазір бұл жағдай прокуратураның бақылауында.