Өскеменде жол жөндеушілердің жолды қалайша өтірік жамайтыны видеоға түсіп қалды, деп хабарлайды Алтайньюс тілшісі.

Сәуір келгелі қалада жол жөндеу ісі жанданды. Әсіресе шұрық-тесік болған жолды жамап-жасқау көп. Өтірік болса да тіпті... Иә, видеоға назар салыңыз. Көретініңіз – жолдың жарығына бір күрек асфальтті төге салған жұмысшылар. Ал оны кім нығарлап баттайды екен? Жалпы жөндеу дұрыс жүргізіліп жатыр ма осы?

– Бұлар қалалық әкімдіктің атына кір келтірді. Мердігерлер осы көшені қайтадан өз қаражатына жөндейтін болды, – деген қалалық әкімдіктің баспасөз қызметкері Әлібек Тұрсымбетов шаһар беделіне нұқсан келтірген мердігердің кім екенін айтудан бас тартты.

Сондай-ақ бұл істі бақылауда ұстайтын жауапты лауазым иесімен сөйлесуге де ниетті едік. Барлық сұрақтың жауабын өзі беретінін айтты. Айтуынша, шенеуніктерге жағдайды үнемі бақылауда ұстау мүмкін бола бермейді екен. «Осындай жағдайға куә болған адамдар, тап осылай видеоға түсіріп бізге жіберсе дейміз», деді жауапты тұлғалардың мүмкіндігі болмаған аралықта бақылай тұруды жүргіншілерге тапсырғандай.

Видео әлеуметтік желіге тарады. Желідегілердің бірі «Инновоциялық технология» деп жазса, келесі адам «жерді жамаған боп өтірік төккен асфальттың кесегі дөңгелектен ұшып, көлікті зақымдайды» деп алаңдаушылық білдіруде.