Биыл өңірде алғаш рет тіл үйренуге арналған «Қонақжай отбасы» жобасы іске қосылды.

10 маусым күні тіл үйренуге ниетті 12-14 жас аралығындағы 68 бала Катонқарағай ауданына аттанған болатын, деп хабарлайды Altaynews тілшісі.

Кеткендеріне ұзақ уақыт болмаса да, балалардың ата-аналары пилоттық жоба туралы жақсы пікірмен бөлісіп жатыр. Ал тіркеліп үлгермегендер жобаның екінші кезеңін ұйымдастыруды сұрап жатқан көрінеді.

Айта кету керек, «Қонақжай отбасы» жобасы аясында балалар 20 күн бойы тіл үйреніп қана қоймай, экскурсияларға, мұражайларға, табиғи қорықтарға барады. Ол үшін арнайы бағдарлама дайындалған.

Білім басқармасы мамандарының айтуынша, жобаға қатысу үшін тек ШҚО-дан емес, Қазақстанның түкпір-түкпірінен өтінім жіберген. Келіп түскен 130 өтінімнің ішінен 68 бала іріктеп алыныпты.

Аймақ басшысы Даниал Ахметов «Қонақжай отбасы» жобасының ауқымы алдағы жылдары кеңейтілетінін айтып отыр. Болашақта Күршім ауданына да ұйымдастыру жоспарланған.