Облыс орталығында ҚР Ұлттық Олимпиада комитетінің 30 жылдығына арналған салтанатты жиын өтті. 
Жиынға еліміздің көк байрағын әлемдік ареналарда желбіретіп жүрген шығысқазақстандық спортшылар, бапкерлер, ардагер спортшылар мен ҚР Ұлттық Олимпиада комитетінің бас директоры Серік Қасқабасов қатысты, деп хабарлайды Altaynews тілшісі.
Еліміздегі Ұлттық Олимпиадалық комитетінің миссиясы – Олимпиадалық қозғалысты дамыту және оны қорғау, Олимпиадалық құндылықтарды насихаттау болып табылады. 

Естеріңізге сала кетейік, ҚР Ұлттық Олимпиадалық комитеті Қазақстандағы Олимпиадалық қозғалыстың 30 жылдығына орай іс-шаралар циклін өткізуде. Бірқатар маңызды шаралар республиканың түкпір-түкпірінде 30 күн бойы өтіп, Астанада ҰОК мерейтойлық сессиясымен аяқталады. 
Бүгінде әр спорт түрі бойынша жасақталған Ұлттық құрама командалардың үздік спортшылары 7 жазғы және 8 қысқы олимпиадалық ойындарға қатысып, барлығы 79 медаль жеңіп алды. Төл тарихымызға Олимп шыңын бағындырған 14 чемпионның аты мәңгілікке алтын әріппен жазылды. 

Жиын соңында спортшылар, ардагерлер мен спорт қайраткерлеріне құрмет көрсетіліп, мерейтойлық медальдар мен алғыс хаттар табысталды.