Шығыс Қазақстанда жыл қорытындыланып, өңірдің дамуына күн сайын маңдай терімен үлес қосып жүрген еңбек адамдары салтанатты түрде марапатталды. Әр салада өз ісіне адалдық танытып, кәсібилігімен ерекшеленген жүзге жуық шығысқазақстандық мемлекеттік және ведомстволық наградаларға, сондай-ақ «Өз саласының үздігі» номинациясы бойынша арнайы марапаттарға ие болды, деп хабарлайды Altainews.kz.

Марапатталғандар қатарында әлеуметтік сала қызметкерлері, өнеркәсіп пен ауыл шаруашылығы мамандары, ұстаздар мен дәрігерлер, орман шаруашылығы мен төтенше жағдайлар қызметінің өкілдері, көлік, бизнес және спорт саласында табанды еңбек етіп жүрген азаматтар бар. Олардың әрқайсысы өңірдің тұрақты дамуына, қоғам игілігі жолындағы нақты істерімен үлес қосып келеді.

Салтанатты жиында сөз сөйлеген Шығыс Қазақстан облысының әкімі Нұрымбет Сақтағанов адал еңбек пен жоғары жауапкершіліктің мемлекет дамуы үшін шешуші мәнге ие екенін атап өтті.

Шара соңында облыс әкімі марапат иелеріне ортақ іске қосқан елеулі үлестері үшін алғыс білдіріп, алдағы жылы да табысты еңбек, толағай жетістіктер тіледі.

Фото: ШҚО әкімдігі