Еріктілер күні аясында облыстық төтенше жағдайлар департаменті және үш ірі ЖОО – Д. Серікбаев атындағы Шығыс Қазақстан техникалық университеті, С. Аманжолов атындағы Шығыс Қазақстан Университеті және Қазақстан-Америка Еркін университеті ынтымақтастық туралы бірлескен меморандумға қол қойды, деп хабарлайды Altaynews.kz тілшісі.

Өзара іс-қимыл шеңберінің бірінші кезеңінде студенттер өрт қауіпсіздігі ережелерін танып, су айдындарында, жер сілкінісі кезінде және туристік жорықтарда не істеу керектігін үйренеді. Соның нәтижесінде алдағы уақытта студенттер халықтың қауіпсіздік мәдениетін арттыруға үлес қосып, құтқарушыларға қолғабыс етеді. Өңірдегі төтенше жағдайлардың алдын алуға көмектесетін профилактикалық рейдтерге, акцияларға, жаттығуларға қатысады.

Меморандумға қол қою рәсімі Д. Серікбаев атындағы Шығыс Қазақстан техникалық университетінде өтті. Бұл құжат өзара тиімді ынтымақтастықты дамытуға мүмкіндік беретін сенімді тетік жасауға мүмкіндік береді.

«Біз облыста жас ұрпақты ТЖ алдын алу саласында белсенділік таныту қаншалықты маңызды екенін түсінгенімізге қуаныштымыз. Бұл патриоттық көзқарастағы, халыққа көмектесуге дайын жастар. Бірлескен ғылыми зерттеулерді жүзеге асыруда Д.Серікбаев атындағы Шығыс Қазақстан техникалық университетінің ғалымдарымен өзара іс-қимыл жасайтын боламыз. Мәселен, Шығыс Қазақстан облысында көшкін белсенділігін зерттеумен ШҚТУ айналысуда. ШҚТУ базасында мониторингтің автоматты  жүйесін әзірлеу беткейлердегі қардың жай-күйі туралы деректерді жинауға және оларды талдауға, қар көшкінінің ықтимал түсуі туралы уақтылы хабарлауға, адамдар мен көліктердің қозғалысын шектеу және қар көшкінін профилактикалық түсіру бойынша алдын алу шараларын уақтылы қабылдауға мүмкіндік береді. Бұл біз үшін өте маңызды жоба, өйткені өңірде 400-ге жуық көшкін қаупі бар учаскелер бар. Қорытынды өнім біздің  Департаментке қауіптерді алдын ала анықтауға айтарлықтай көмектеседі», - деді ШҚО ТЖД бастығы Ерғали Бахаев.