Ұлттық өнер мен салт-дәстүрді дәріптейтін байқау өтіп жатыр - ШҚО
Бүгін Өскеменде "Мәңгілік ел - болашаққа ұмтылған ел" облыстық байқауы өтіп жатыр.
Ұмыт болып бара жатқан ұлттық өнеріміз бен салт-дәстүрімізді жаңғыртуға бағытталған байқауға өңіріміздің барлық ауданынан жиналған 160-тан астам дарынды жастар қатысып отыр, деп хабарлайды Altaynews.kz тілшісі.
- Президентіміз Қасым-Жомарт Тоқаев тәрбие ісінде ұлттық педагогика бастауларын да назардан шығармай, балаларымыздың бойына қазақтың салт-дәстүрі мен құндылықтарын сіңіру маңызды екенін атап айтқан болатын. Сондықтан биылғы байқаудың тақырыбын ұлтымыздың әдет-ғұрыптарын дәріптеуге арнадық, - дейді "Дарын" орталығы облыстық филиалының басшысы Гауһар Рахымжанова.
Облыстық байқаудың алғашқы кезеңінде команда жетекшілері эссе жазса, қалған оқушылардың Қазақстан тарихы пәні бойынша білімдері сыналды. Ал екінші кезеңде "Сүйінші", "Айтыс", "Сал-серілік", "Киіз басу", "Асар" тағы да басқа сахналық қойылымдарын көрсетуде.
Қазылар алқасының бағалауынан кейін байқау жеңімпаздары мен жүлдегерлері анықталып, сыйлықтармен марапатталады.
Айжанат Бақытқызы
