Ақпараттық қауіпсіздік комитеті киберқауіпсіздік саласындағы жетекші компаниялармен және бірқатар мемлекеттік органдармен бірлесіп, CITIZENSEC.KZ және NOMADGUARD.KZ тегін онлайн-порталдарын іске қосты. Бұл бастама ел тұрғындарының цифрлық сауаттылығын арттыруға, интернеттегі қауіп-қатерлерге қарсы тұруға және жеке деректерді қорғау мәдениетін қалыптастыруға бағытталған, деп хабарлайды Altainews.kz тілшісі ҚР Жасанды интеллект және цифрлық даму министрлігінің баспасөз қызметіне сілтеме жасап.

Аталған платформалар халықтың киберсауаттылығын көтеруді, интернет-алаяқтықтың алдын алуды, сондай-ақ ата-аналар мен балаларды интернетті қауіпсіз әрі жауапты пайдалануға үйретуді көздейді. Порталдарда ұсынылған материалдар қарапайым тілде әзірленіп, әртүрлі жас санатындағы пайдаланушыларға қолжетімді форматта ұсынылады.

2024 жылдан бері CITIZENSEC.KZ және NOMADGUARD.KZ порталдарына 1 миллионнан астам пайдаланушы кіріп, олардың 71 мыңнан астамы оқыту курстарын толық аяқтаған. Бұл көрсеткіштер қазақстандықтардың цифрлық қауіпсіздікке деген қызығушылығы мен қажеттілігінің артып келе жатқанын айқын көрсетеді.

CITIZENSEC.KZ платформасында азаматтармен қатар мемлекеттік қызметшілерге арналған арнайы оқыту бағдарламалары да іске асырылуда. Бүгінгі күні бұл курстарды 5 мыңнан астам мемлекеттік қызметші сәтті тәмамдап, ақпараттық қауіпсіздік саласындағы білімін жетілдірді. Бұл мемлекеттік органдардағы цифрлық қауіпсіздік деңгейін арттыруға оң әсер етуде.

NOMADGUARD.KZ порталы азаматтарға жеке деректердің таралу фактілерін анықтауға, сондай-ақ күмәнді сілтемелер мен сайттарды фишинг және өзге де киберқауіптерге тексеруге мүмкіндік береді. Порталдың көмегімен пайдаланушылар өз деректерінің таралуы болған-болмағанын, қай ресурстар арқылы тарағанын және деректердің қандай көлемде бұзылғанын нақты біле алады.

Портал іске қосылған уақыттан бері NOMADGUARD.KZ платформасында 608 мың азамат тіркеліп, 6 мыңнан астам сілтеме қауіпсіздік талаптарына сай тексерілген. Бұл деректер азаматтардың киберқауіпсіздікке бейжай қарамай, өз ақпаратын қорғауға белсенді түрде ұмтылып отырғанын көрсетеді.

CITIZENSEC.KZ және NOMADGUARD.KZ порталдары интернеттегі қауіптерді тереңірек түсінуге, жеке деректерді қорғау дағдыларын қалыптастыруға және алаяқтардың құрбаны болмауға көмектеседі. Бұл платформалар – әрбір азаматтың жеке қауіпсіздігіне ғана емес, тұтастай алғанда елдің ақпараттық қауіпсіздігіне қосылған маңызды үлес.

Халықтың цифрлық сауаттылығын арттыру және кибергигиена мәдениетін қалыптастыру мақсатында алдағы уақытта киберқауіпсіздік ережелерін сақтауға үндейтін ақпараттық материалдар мен визуалды баннерлерді сыртқы цифрлық экрандар мен билбордтарда орналастыру мүмкіндігі қарастырылып отыр. Мұндай шаралар азаматтарды кеңінен ақпараттандыруға және алдын алу жұмыстарын күшейтуге ықпал етеді.

Сонымен қатар көпшілік жиналатын орындарда кибергигиенаға арналған әлеуметтік жарнамаларды орналастыру жоспарланып отыр. Бұл азаматтардың жеке деректерді қорғау мәселесіне деген жауапкершілігін арттыруға бағытталған.

Айта кету керек, жақында eGov Mobile мобильді қосымшасында CITIZENSEC.KZ порталының кибергигиена бойынша курстары, сондай-ақ цифрлық қауіпсіздікке арналған негізгі материалдар мен практикалық ұсынымдар жинақталған арнайы тақырыптық журнал қолжетімді болды. Бұл азаматтарға киберқауіпсіздік жөніндегі маңызды ақпаратты бір жерден алуға мүмкіндік береді.