Білім саласында үлкен өзгерістер орын алып жатыр - білім министрі
Биыл “Келешек” бағдарламасы жүзеге асырылып, бастапқы білім беру капиталы ретінде есеп-шоттар ашыла бастайды.
Бұл туралы ҚР ғылым және жоғары білім министрі Саясат Нұрбек айтты, деп хабарлайды Altaynews.kz тілшісі.
Айта кету керек, қазір облыс орталығында ғылым және жоғары білім министрінің өңір тұрғындарымен кездесуі өтіп жатыр.
Министрдің айтуынша еліміздегі демографиялық өсімді ескерсе, алдағы жылдары жастардың көбін грантпен қамту мүмкін болмайды.
- Қазір білім саласында үлкен өзгерістер болып жатыр. Мемлекет басшысы Қасым-Жомарт Тоқаев биылғы Жолдауында бес жастан асқан балаларға арналған «Келешек» атты бірыңғай ерікті жинақтау жүйесін енгізуді тапсырған болатын. Елімізде қазір демографиялық өсім байқалады. Грант саны да жыл сайын өсіп келеді. Келесі жылы 93 мыңға жуық грант бөлу жоспарланып отыр. Бірақ оның өзі жеткіліксіз болуы мүмкін, - деді министр.
“Келешек” бағдарламасы аясында жеңілдетілген несие және сараланған гранттар қарастырылған. Аталған бағдарлама аясында келесі жылдан бастап есеп-шоттар ашыла бастайды.
- Балалардың жарқын болашағы үшін «Ұлттық қор – балаларға» жобасын іске асырып жатқаны белгілі. Осы аталған жобалар үшін келесі жылы халықты ақпараттандыру орталығы да өз жұмысын бастайды. Яғни, еліміздің кез келген азаматы өзін толғандырған сұрақпен сол орталыққа жүгіне алады, - деді Саясат Нұрбек.
Оқи отырыңыз
