Бүгін Сәрсен Аманжолов атындағы Шығыс Қазақстан университетінің «Абай» залында жиһанкез журналист Оңдасын Елубайдың «Ғұмыр дастан» және «Көзден кетсе де» атты кітаптарының тұсаукесері ұйымдастырылды, деп хабарлайды Altainews.kz тілшісі.

Биыл ғана 75 жасқа толған кеш қонағы саналы ғұмырында ұзын-саны жиырма төрт кітап жазған екен. Осымен болдым, толдым деп отырған автор жоқ. Әлі де жаңа туындылар жазылып жатқанын айтады, бүгінде елордада тұратын жерлесіміз. Қазіргі уақытта да қаламын қолынан тастаған жоқ, республикалық «Қазақ спорты» газетінің өңірдегі меншікті тілшісі.

Кеш тізгінін қолға алған университет ректоры Мұхтар Төлеген бүгінгі кездесуге оқу орнының денешынықтыру мамандығында оқып жатқан студенттердің көптеп қатысып отырғанын айтып, олардың жеткен жетістіктеріне, аталмыш шараның маңыздылығына тоқталды. Оның себебі де жоқ емес. Автордың әр жылдары жарық көрген кітаптарының басым дені спорт тақырыбына арналған. Әлемдік айтулы спорт додаларынан әзірленген тартымды да тағлымды, танымдық дүниелер.

Жиында облыстық Ішкі саясат басқармасының басшысы Айдар Садырбаев облыс әкімі Нұрымбет Сақтағановтың кеш иесіне арнайы жолдаған ізгі құттықтауын көпшілік алдында оқып берді.

Құттықтаумен, қатар облыс әкімдігі атынан мерейтой иесінің иығына оқалы шапан да жабылды.

Салтанатты басқосудың аясында қаламгердің замандас аға-бауырлары, әріптестері, есімдері елге белгілі ардагер спортшылар, меценат кәсіпкерлер Ербол Баянғазин, Сейілжан Сайлаубаев, Марат Мұзапаров, Мұқан Ағзамов, облыстық дене шынықтыру және спорт басқармасының басшысы Асқар Можанов сынды азаматтар кезегімен сөз тізгінін алып, қаламгерге жүрекжарды жылы лебіздерін білдіріп, қазақы дәстүрмен арнайы сый-құрметтерін көрсетті.

Оңдасын Елубаймен ұзақ жылдар шеңберінде қоян-қолтық қызметтес болып, күні бүгінге дейін сыйластығы үзілмеген әріптес інілерінің бірі, еліміздің мәдениет қайраткері, Қазақстанның Құрметті журналисі, облыстық «Didar» газетінің бұрынғы редакторы Уәлихан Тоқпатаев оның азаматтық тұлғасына көпшіліктің назарын аударды.

Жазушы, полковник, елге белгілі азамат әрі оқушы кезден сыныптасы Совет Иманғали да досының балалық, жігіттік жылдарынан қызықты естеліктерді әдемілеп әңгімелеп берді. Кәсіби біліктілігіне, журналиске тән шапшаң қимылына, еңбекқорлығына, ұлт мүддесі, ұлт намысы жолындағы қылыштай қиып түсер өткір мінезіне нақты мысалдар келтіріп, кеңінен тоқталды.

Өз кезегінде ректор бастаған университет ұжымы да мерейтой иесіне сый құрметін аяп қалған жоқ. «Қазақ тілі мен әдебиеті» мамандығының 2 курс студенті, жас ақын Әли Ермекұлы арнауын төгілтсе, «Жас талант» өнерпаздар клубының домбырашылары Нұрғиса ағамыздың «Аққу» күйін нақышына келтіре күмбірлетті. Күні кеше Ташкенттегі додадан жеңімпаз болып оралған, халықаралық дәрежедегі спорт шебері, кикбоксингтен Әлем кубогінің жеңімпазы Ернұр Қайырбеков барлық студенттердің атынан осындай тамаша кездесу үшін алғыс айтты.

Шара аясында Оңдасын Елубайұлы мен өмірлік серігі, ардагер ұстаз Жүрсін Төлегенқызы осындай тағылымды, жас ұрпақ үшін тәрбиелік мәні жоғары шараның ұйымдастырушыларына риясыз алғысын білдірсе, кездесу қонақтары мен студенттер қаламгерге көкейдегі сұрақтарын қойып, жаңа кітабына қолтаңба алды, бірге естелік суретке түсті.

Журналист, жазушы Оңдасын Елубаевпен дәл осындай кездесу Сәрсен Аманжолов атындағы университеттің №9 оқу ғимаратында журналистика факультеті студенттерімен де ұйымдастырылды.

Белгілі тілші-ғалым Зәки Ахметовтің есімін иеленген кең аудиторияға жиналған болашақ жас журналистер ардагер ағаларына мамандыққа қатысты толғандырған сауалдарын қойып, көп жылғы журналистік өмір тәжірибесінің қызыққа толы сәттерінен әдемі естеліктер тыңдады.

Сұрақ-жауап форматында еркін өткен шараға ұйтқы болған университеттің Гуманитарлық ғылымдар жоғары мектебінің деканы Сләмбек Оразалин жиналғандарға биыл 75 жасқа толып отырған Оңдасын Елубайұлының өмір жолынан мол мағлұмат беріп, ардагер журналистің таяуда ғана жарық көрген «Ғұмыр Дастан» және «Көзден кетсе де...» кітаптарының маңыздылығына, басты кейіпкерлердің азаматтық ұстанымдарына тоқталды.

Дәурен Аллабергенұлы

Фото: С.Аманжолов атындағы ШҚУ баспасөз қызметі