Шығыс Қазақстан — табиғи-климаттық жағдайы күрделі, жер бедері алуан өңір. Қысы қатаң, жолы шалғай, ауа райы құбылмалы аймақта төтенше жағдайлардың алдын алу мен жедел әрекет ету – аса маңызды міндет. Осы бағытта өңірде құтқару қызметінің материалдық-техникалық базасын жаңарту жұмыстары жүйелі түрде жүргізілуде, деп хабарлайды Altainews.kz.

Жуырда Шығыс Қазақстан облысының құтқару бөлімшелері заманауи, жоғары өтімді жол талғамайтын автокөліктермен және арнайы техникалармен толықты. Бұл көліктер кез келген ауа райы мен күрделі жол жағдайында жұмыс істеуге бейімделген. Олар табиғи апаттар, жол-көлік оқиғалары, су тасқыны, қар құрсауында қалған елді мекендер мен өзге де төтенше жағдайлар кезінде жедел көмек көрсетуге мүмкіндік береді.

Жаңа техника ең алдымен жетуі қиын, шалғай аудандарға жіберілді. Бұл — таулы және орманды аймақтарда, алыс ауылдарда тұратын тұрғындардың қауіпсіздігін қамтамасыз етуге бағытталған маңызды қадам. Құтқарушылар үшін әр минуттың құны жоғары екенін ескерсек, сенімді әрі қуатты техниканың маңызы ерекше.

Айта кету керек, құтқару қызметінің техникалық әлеуетін арттыру — өңір тұрғындарының қауіпсіздігін күшейтуге бағытталған мемлекеттік саясаттың бір бөлігі. Заманауи техникамен жарақтандырылған құтқарушылар кез келген сын-қатерге дайын болып, халыққа дер кезінде көмек көрсетуге қабілетті.

Фото: ШҚО ТЖД