Жаңа жыл мерекесі қарсаңында Шығыс Қазақстан облысында тұрғындардың қауіпсіздігін қамтамасыз ету мақсатында құтқару қызметтері күшейтілген жұмыс режиміне көшті. Бүгіннен бастап облыстық Төтенше жағдайлар департаментінің барлық гарнизондары жоғары дайындық жағдайында қызмет атқаруда, деп хабарлайды Altainews.kz.

Өңірдің қалалары мен аудандарындағы бөлімшелерде тәулік бойы шамамен 300-ге жуық жеке құрам және 100-ден астам арнайы техника бірлігі жұмылдырылды. Құтқарушылар кез келген төтенше жағдайға жедел әрекет етуге дайын.

Өткен 2025 жылдың қорытындысы құтқарушылар еңбегінің маңызын айқын көрсетті. Жыл бойы Шығыс Қазақстан облысының Төтенше жағдайлар департаментіне 251 118 қоңырау келіп түсті. Жедел-құтқару жұмыстарының нәтижесінде 332 адам ажалдан аман қалып, түрлі төтенше жағдайлар кезінде қауіп аймағынан 506 азамат эвакуацияланды.

Осыған байланысты ШҚО ТЖД тұрғындарды жеке қауіпсіздікке бейжай қарамауға шақырады. Мамандар құтқарушылардың ұсынымдарын қатаң сақтауға, дауылды ескертулерді, ауа райының күрт өзгеруі мен жол қозғалысының шектелуі туралы ресми хабарламаларды үнемі қадағалап отыруды ескертеді. Сонымен қатар, өрт қауіпсіздігі талаптарын сақтау, тұрмыста және мерекелік кештерде пиротехникалық бұйымдарды абайлап қолдану аса маңызды.

Құтқару қызметі өкілдері ауа райы қолайсыз болған жағдайда мұз үстіне шықпауға, алыс қашықтыққа сапарға аттанбауға кеңес береді. Әрбір азаматтың сақтығы мен жауапкершілігі — мерекелік күндердің қауіпсіз әрі тыныш өтуінің басты кепілі.

Жаңа жылды қарсы алу — қуаныш пен үмітке толы сәт. Бұл сәттің қауіпсіз жағдайда өтуі әркімнің өзіне байланысты.