Шымкент қаласында ҚР ІІМ Ұлттық ұланының 6506 әскери бөлімінде бұрын бір сыныпта оқыған 12 жас сарбаз мерзімді әскери қызметін қатар атқарып жүр. Бұл – әскер қатарында өте сирек кездесетін жағдай, деп хабарлайды Altainews.kz тілшісі.

Ұлттық ұланның баспасөз қызметінің мәліметінше, сарбаздардың барлығы Алматы облысы Жамбыл ауданына қарасты Үмбетәлі Кәрібаев атындағы орта мектептің түлектері. Бір мектептен, бір сыныптан шыққан жігіттердің бір әскери бөлімге түсуі – үлкен кездейсоқтық.

Бөлім басшылығының айтуынша, әдетте әскерге шақырылған азаматтар әртүрлі өңірлерге бөлінеді. Ал бұл жағдайда сыныптастардың бір бөлімге түсуі олардың әскери қызметке бейімделуіне оң әсерін тигізіп отыр.

Қазіргі уақытта жас сарбаздар оқу пунктінде бастапқы әскери дайындықтан өтіп, әскери қызметтің негізгі талаптарын меңгеруде. Командирлер олардың ұйымшылдығын, тәртібін және бір-біріне қолдау көрсетудегі белсенділігін жоғары бағалап отыр.

Фото: ҚР ҰҰ