Өскеменде 19-шы шағын ауданын абаттандыру жұмыстары соңына жетті, деп хабарлайды Алтайньюс тілшісі.

Тұрғын ауданда мектеп, балабақша, емхана мен басқа да әлеуметтік нысандар бірінен соң бірі бой көтергенімен, аудандағы тұрғын үй кешендерінде жайлы жағдай жасауға байланысты жұмыстар ақсап келді. Осыған орай аймақ басшысы Даниал Ахметовтің тапсырмасымен өткен жылы тұрғын ауданды абаттандырудың кешенді жоспары әзірленіп, 2020 жылы оның кескін-келбетін түбегейлі өзгерту жоспарланды. Жоспар бойынша абаттандыру жұмыстарын екі кезеңде жүргізілді.

- Бұл мақсат толық орындалып, ұзақ мерзімді жоба жұмыстары соңына жетті. Дегенмен мұнымен бәрі бітті деген сөз емес. Жұмыстар әлі жалғаса береді. Жаяу жүргіншілер жолдарының бойын жарықтандырып, жерасты сулары ағатын каналдар маңын абаттандыру да көзделген. Ол да атқарылды. Жобаның екінші кезеңінде тұрғын ауданның 1-ші және 2-ші кварталдарының қалған бөліктерін абаттандыру жоспарланды. Қос кезеңде атқарылған жұмыстар нәтижесінде тұрғын ауданда бірқатар істің басы қайырылып, көпқабатты тұрғын үйлердің аулалары абаттандырылып, балалардың ойын және спорт алаңдары салынды, - дейді Өскемен әкімі Жақсылық Омар

Атап айтсақ, бөлінген қаржыға 12 аула абаттандырылды. Сонымен қатар тротуарлар мен аула жолдары қалпына келтірілді. Тұрғын аудандағы аллея мен аула ішіндегі және квартал ішіндегі жолдар, сондай-ақ балалардың ойын және спорт алаңқайлары жарықтандырылды.

- Сметалық құжаттамаға сәйкес, аудан бойынша 381 дана жарық бағандарын орнату жоспарланып, мақсат толық орындалды. Бүгінгі таңда орнатылған жарық бағандарының басым бөлігі аулаларды жарықтандыруға арналса, қалғаны аулаішілік және кварталішілік жолдар мен аллеяны жарықтандыруға арналды. Бұдан бөлек, абаттандыру жұмыстарымен жарты шақырымнан астам жауын суы ағатын канал жасалып, мыңға таяу жас ағаш көшеттері отырғызылды, - деп қосты қала әкімі

Жалпы, тұрғын ауданды жасыл желекпен көмкеру жұмыстары мұнымен тоқтап қалмайтын сыңайлы. Қаланың құзырлы органдарының хабарлауынша, әлі де 1600-ден астам көшет отырғызылмақ.

Сонымен қатар 20 мың шаршы метрден астам аумаққа газон егіліп, тұрғын ауданның аллеясындағы 5,4 мың шаршы метр аудан жасанды жасыл шөппен көмкерілді. Жүргізілген жұмыстар нәтижесінде бөлінген қаржы мақсатты жұмсалып, толық игерілді.

Жалпы, былтыр Өскемен қаласы бойынша «Жұмыспен қамтудың жол картасы» бағдарламасы аясында 55 аула абаттандырылды. «Алтайстрой» және «Ремдор» мекемелерімен келісімшарт бекітіліп, аулалар түрленді. Атап айтсақ, қураған ағаштар кесіліп, 24 ойын, бес спорт және жеті тартанды алаңдар орнатылды. Бұдан бөлек, 10 мың шаршы метр алаңға тас тақталар төселіп, төрт мың шаршы метр жерге газон егілді. Сегіз мың текше метр құнарлы топырақ төгіліп, демалыс алаңдары жасалды. Бүгінгі таңда тұрғындардың тілек-талаптарына орай жүргізілген абаттандыру жұмыстары аяқталды.