Күнбағыс тұқымын өңірден сыртқа экспорттауға не кедергі?
Шартты сурет
Шығыс Қазақстан облысында кедендік баж енгізілген күнбағыс тұқымын экспорттау мәселесі әлі өзекті болып тұр.
Аграршылар оларды бизнеске қосымша жүктемеден босатуды және осы мәселе бойынша неғұрлым тиімді шешім қабылдауды сұрайды, деп хабарлайды Altaynews тілшісі.
– Өздеріңіз білетіндей, Шығыс Қазақстан облысы елімізде майлы дақылдарды өсіру және оларды терең өңдеу бойынша көшбасшылардың қатарында. Бірақ аграршыларымыз үшінші жыл қатарынан тыйым салу, шектеулер, түрлі квоталар мен баждар аясында өмір сүріп келеді, – дейді Өңірлік кәсіпкерлер палатасының агроөнеркәсіптік кешен бөлімінің басшысы Данияр Әкімбаев.
Мәселен, 2023 жылдың 4 ақпанынан бастап Қазақстанда күнбағыс экспортына тоннасына 20% немесе 100 еуро мөлшерінде кедендік баж қолданылады. Бұл норма фермерлердің қалтасына қатты соғуда әрі бизнеске қосымша жүктеме болып тұр. Алғашында өңір фермерлеріне экспорттық баждың орнына күнбағыс тұқымын шетелге сатуға сандық квота белгілеуге уәде берілген-ді. бірақ бұл да орындалған жоқ.
– Ақпан айының басынан бастап ШҚО кәсіпкерлер палатасына осы мәселе бойынша кәсіпкерлерден оннан астам өтініш келіп түсті. Біз проблеманы АӨК және тамақ өнеркәсібі кеңесінің қарауына шығардық. Барлық бизнес ұсыныстарды Ауыл шаруашылығы министрлігіне жібердік. Бірақ әлі нақты жауап алған жоқпыз, – деді Данияр Әкімбаев.
Оқи отырыңыз
