Мәжіліс депутатымен кездесуде өскемендіктер экология мәселесін көтерді
Парламент Мәжілісінің депутаты Асхат Рахымжанов Шығыс Қазақстан облысының халқымен кездесті.
Жиналған жұртшылық өңірдегі мәселелерді тілге тиек етіп, өздерін толғандырған сұрақтарға жауап алды, деп хабарлайды Altaynews.kz тілшісі.
- Сапарымыздың мақсаты - әр аймақ тұрғындарының ұсыныс-тілектерін, мұң-мұқтажын тыңдап, жауапты мекемелерге жеткізу. Шығысқа іссапармен алғаш рет келіп отырмын. Сондықтан жергілікті партия филиалының өкілдерімен, тұрғындармен кездесу өткізуді жоспарладық, - дейді Асхат Рахымжанов.
Тұрғындар облыс орталығының экологиясы, уақыт белдеуінің ауысуы сияқты сұрақтарды алға тартты.
Жиналған көпшілікті мұқият тыңдаған халық қалаулысы аталған мәселелерді құзырлы органдарға жеткізетінін айтты.
Осы іссапар аясында Мәжіліс депутаты Риддер жылу электр орталығына барады.
- Елімізде жылу электр орталықтары мен су электр станцияларының жағдайы өзекті мәселеге айналып отырғаны белгілі. Халықтың тұрмыс-тіршілігіне тікелей қатысы бар салаларды үнемі назарда ұстауымыз керек. Сол себепті Риддер қаласына да ат басын бұрып, жөндеуден өткен жылу орталығының жағдайымен танысамыз, - деді депутат.
Оқи отырыңыз
