Бүгін Өскеменде «Таза Қазақстан» жалпыұлттық экологиялық акциясы аясында Амфитеатр алаңында ерекше игі бастама өтті. Жастардың шығармашылық ордасына айналған орында өскелең ұрпақ табиғатты түлетуге үлес қосып, шырша мен қайыңжапырақ көшеттерін отырғызды, деп хабарлайды Altainews.kz тілшісі. 

2019 жылы «Бірге – Таза Қазақстан» ұранымен бастау алған акция бүгінде аясын кеңейтіп, ел мен жерді түлетті. Игі шара тек тазалыққа үндемей, миллиондаған адамдардың бірлігіне, татулығына, мәдени өресінің еселенуіне түрткі болды. 

Шараға Шығыс Қазақстан облысының әкімі арнайы Нұрымбет Сақтағанов қатысып, ағаш екті. Аймақ басшысы бұл акцияның мәні тек табиғатты қорғауда ғана емес, адамның ішкі тазалығын қалыптастырумен де тығыз байланысты екенін атап өтті.

Көктем мен күз – табиғаттың түлеп, түрленетін қос мезгілі. Дегенмен, мамандардың айтуынша, күзде егілген ағаштың тамыры тереңге бойлап, өміршеңдігі жоғары болады.

Акцияға қала тұрғындары мен еріктілерден бөлек, еліміздің танымал эстрада әншілері мен блогерлер де атсалысты. «Мұзарт» тобының әншісі Кенжебек Жанәбілов табиғатты аялауға бағытталған шараның маңызын атап өтті. 

Еліміздің ерен жетістіктерін «Алға Қазақстан» ақпарат көзінде ұлықтап жүрген блогер Иван Червинский Шығыс Қазақстанның болашағына зор сенім білдіреді. 

Табиғатты аялау — әр азаматтың парызы. «Таза Қазақстан» акциясы соның жарқын дәлелі. Көшет отырғызған әр жасыл желек — бүгінгі игі істің, ертеңгі таза болашақтың кепілі.

Айдос Мырзахметов 

Фото/видео: Руслан Акматалиев