Бұқаралық спортты дамытуды, салауатты ұлт қалыптастыруды мұрат тұтқан бұл спорт мерекесі Өскеменде былтыр тұңғыш рет ұйымдастырылған болатын.

Бүгін Шығыс Қазақстан облысының орталығында «Oskemen cross fest – 2023» дәстүрлі шағын марафоны өтті, деп хабарлайды Altaynews.kz тілшісі.

Бұл спорт мерекесі Өскеменде былтыр тұңғыш рет ұйымдастырылған. Ол кезде жаппай жүгіруге 200-дің үстінде ғана адам қатысқан еді. Биыл желмен жарысқан желаяқтар қатары сәл көбейіпті. Жиыны 300-ге тарта адам жарыс көрігін қыздырды.

Өскемен қаласының денешынықтыру, спорт және туризм бөлімінің басшысы Ербол Қоңыратов төрт жүз мыңнан астам халқы бар қалада жаппай жүгіру жарысына үш жүздей ғана адам қатысуы марқаятын нәтиже емес дейді. Оның айтуынша, бұл — төмен көрсеткіш.

Шағын марафонның ережесіне сәйкес жеңімпаздар мен жүлдегерлер сегіз жас ерекшелігі бойынша анықталды. Қатысушылардың ең жасы 14-ке енді толса, ең үлкені 70 жастан асқан қария болды. Бұған дейін жазғанымыздай 14-17 жас аралығындағылар үш шақырымдық сайыста бақ сынаса, 18 жастан асқандар бірнеше жас санаты бойынша 10 шақырымға жүгірді.

Бөлім басшысының айтуынша, спорттық шараның өтетіндігі туралы хабарлама әлеуметтік желілер мен мессенджерлерде, БАҚ-тарда бір ай бұрын жарияланған. Жарнамасы да ойдағыдай жүргізілген. Соған қарамастан белсенділік төмен. Неге? Спортқа жауапты сала мамандары бұл сұрақтың да жауабып іздеп, зерделеп жатқан көрінеді. Нәтижесіне қарай әрекет етеміз деп отыр.

Шағын марафонда мәре сызығын жеке дара кесіп өтіп, ерлер арасында бас бәйгені олжалаған Әмір Байтуканов жеңіс тұғырының ең биігіне көтерілді. Ол 10 шақырымдық қашықтықты 28 минут 07 секундта жүгіріп өтті.

Жеңімпаздар мен жүлдегерлерге медальдар және қаладағы жаттығу залына бір ай тегін баруға сертификаттар табыс етілді.