Қазақстанның авиациялық әкімшілігі елімізден АҚШ-қа тікелей рейстерді іске қосуға жол ашатын келісімге қол қойды, деп хабарлайды Altainews.kz тілшісі Zakon.kz ақпараттық порталына сілтеме жасап.

Азаматтық авиация комитетінің мәліметіне сай, Мемлекет басшысының Қазақстан мен АҚШ арасында тікелей әуе қатынасын ұйымдастыру жөніндегі тапсырмасын жүзеге асыру шеңберінде азаматтық авиация комитеті Қазақстанның АҚШ-тағы елшілігімен бірлесе отырып әрі Сыртқы істер министрлігінің қолдауымен АҚШ Федералды авиациялық әкімшілігімен ұшу қауіпсіздігі бойынша алдын ала халықаралық бағалауды (IASA) өткізу туралы келісімге қол қойды.

IASA-ны алдын ала бағалау бұдан әрі Федералды авиациялық әкімшілігінің 1-санаттағы мәртебесін алуға бағытталған және тиісті әуе кемелері болған кезде Қазақстан мен АҚШ арасындағы отандық әуе компанияларына тікелей әуе қатынасын іске қосуға мүмкіндік береді.

2024 жылдың ақпанында АҚШ-тың ҚР-дағы елшісі Дэниел Розенблюм өз еліне тікелей рейстерді іске қосу өте күрделі процесс екенін айтты. Оның айтуынша, бұл шамамен 2025 жылы болуы мүмкін.