Риддер қаласындағы Абай көшесінде орналасқан көпқабатты тұрғын үйдің 3-қабатында өрт шыққан. 3-қабаттағы пәтерлердің бірінен шыққан түтінді байқаған тұрғындар өрт сөндірушілерге хабарлаған көрінеді.

Оқиға орнына жеткен мамандар жай-күйді анықтап, жиһаздар мен өзге заттардың жанып жатқанын байқаған, деп хабарлайды Altaynews тілшісі.

10 шаршы метр аумақты шарпыған өрт сөндірілді. Өрт кезінде пәтерде адам болмаған. Түтін басқан подъезден 7 тұрғын өз бетінше шығып үлгерген, оның ішінде 1 бала бар.  

Өртті сөндіруге 9 өрт сөндіруші мен 3 техника жұмылдырылды. Болжам бойынша, электр жабдықтарын пайдалану кезінде өрт қауіпсіздігі талаптарын сақтамау өрттің тұтануына себеп болған.