Премьер-Министрдің орынбасары Роман Скляр 9 моноқаланы дамыту үшін 1 трлн 203 млрд теңге бөлінетінін жеткізген.

9 қаланың тізіміне ШҚО-дағы 3 қала да қосылған, деп хабарлайды Altaynews Қазақпарат агенттігіне сілтеме жасап.

Кешенді жоспар шеңберінде денсаулық сақтау, білім, спорт, инженерлік инфрақұрылым объектілерін салу, шағын және орта бизнесті, АӨК дамытуға бағытталған және басқа да іс-шаралар көзделген.

Тізімге енген Алтай қаласы бойынша жалпы сомасы 39,7 млрд теңгені құрайтын 34 іс-шара жоспарланған. Оның ішінде республикалық бюджеттен – 7 млрд теңге, жергілікті бюджеттен – 4,6 млрд теңге, жеке инвестиция бойынша 28,1 млрд теңге бөлінбек.

Ал Риддер қаласы бойынша жалпы сомасы 36,8 млрд теңге болатын 45 шара ойластырылған. Оның ішінде республикалық бюджеттен – 7,9 млрд теңге, жергілікті бюджеттен – 6,2 млрд теңге, жеке инвестиция бойынша 22,7 млрд теңге жұмсалады.

Серебрянск қаласы бойынша жалпы сомасы 6,9 млрд теңгеге 20 іс-шара қарастырылған. Оның ішінде республикалық бюджеттен – 3 млрд теңге, жергілікті бюджеттен – 2,8 млрд теңге, жеке инвестициядан 1,1 млрд теңге бөлінеді.