ШҚО-да екпеден бас тарту жағдайлары үш есе көбейген.

Бұл туралы Өңірлік коммуникациялар қызметінің баспасөз мәслихатында Санитариялық-эпидемиологиялық бақылау департаменті басшысының орынбасары Сәуле Слямғазина айтты, деп хабарлайды Altaynews тілшісі.

Жыл басынан бері ШҚО-ның 9 аумағында екпеден бас тартудың 78 жағдайы тіркелген.

Өткен жылғы осы кезеңмен салыстырғанда вакцинадан бас тарту жағдайы 3 есе артқан.

Брифингте ағымдағы жылдың I тоқсанындағы облыс тұрғындарын иммундау қорытындысы жайлы да айтылды.

Биыл А-2 вирустық гепатитіне қарсы вакцина 1681 балаға салынды, кене энцефалитіне қарсы 6874 адам, құтыруға қарсы 213 адам егілді.

Айта кетсек, Қазақстанда 11 инфекцияға қарсы екпе алу міндетті болып табылады. Шығыс Қазақстан облысының 25 емханасында вакцинация жүргізіледі.