Буллинг - бүгінгі таңда жасөспірімдер арасында кең тараған өзекті мәселелердің бірі. Бұл жағымсыз көрініс спорт саласында да кездеседі. Спорт ұйымдарында балалар мен әйелдер арасындағы буллингке қалай тосқауыл қоюға болады, осы келеңсіздіктің алдын алу үшін не істеу керек?

Өскеменде ШҚО спорт басқармасы мен Полиция департаменті бірлесіп ұйымдастырған жиында осы мәселе көтерілді, деп хабарлайды Altaynews.kz тілшісі.

Облыс бойынша бала құқықтары жөніндегі уәкіл Аксана Қаленова спорт мектептерінде жаттықтырушының талаптары мен буллингтің аражігін ажырата білу керек деген пікірімен бөлісті.

Буллингпен күресу үшін ата-аналармен, бапкерлермен жұмыс істеу және жаттықтырушы-педагогикалық құрамның біліктілігін арттыру қажет.

Жергілікті полиция қызметінің ювеналдық полиция тобының инспекторы, полиция подполковнигі Қарлығаш Кудекенова «101» колл-орталығы бар екенін, жәбір көрген жасөспірімдер осы телефонмен хабарласып, шағымдана алатындарын ескертті. Әңгіме құпия түрде сақталады, ал жәбірленушімен арнайы мамандар сөйлеседі, қылмыстық құрамы бар іс-әрекеттер болса, онда полиция қызметкерлеріне хабарлайды.