Шығыс Қазақстан облысында Beginit by inDrive әлеуметтік көшбасшылық және жобалық жұмыс курсына іріктеу кезеңі басталды.

Astana Hub және Oskemen IT Hub қолдауымен қолға алынған бастама жастардың әлеуетін ашуға және аймақтың әлеуметтік саласында инновациялық шешімдер жасау дағдыларын дамытуға көмектеседі. Beginit бағдарламасы қазір еліміздің алты өңірінде қанатқақты жоба ретінде қолға алынған, оның ішінде Шығыс Қазақстан да бар, деп хабарлайды Altaynews.kz тілшісі.

Жоба ауылдың оныншы сынып оқушыларына әлеуметтік көшбасшылық бойынша білім беру курсынан өтуге мүмкіндік береді. Тәжірибелі бизнес және креативті сала жетекшілері қатысушыларға аймақтағы өзекті мәселелерді шешу үшін ғылыми және әлеуметтік жобалар құруды үйретіп, бағыт-бағдар береді.

Шығыс Қазақстан облысындағы Astana Hub аймақтық менеджері Дидар Мұратұлының айтуынша, Beginit бағдарламасының финалистері 2025 жылы Алматыда ашылатын жаңа инновациялық университетте оқуға грант алады.

 Анықтама

 Astana Hub – 2018 жылдың 6 қарашасында құрылған Орталық Азиядағы ең ірі IT-стартаптар технопаркі. Astana Hub қызметі ІТ-бизнес үшін экожүйе құруға, ІТ саласындағы таланттарды оқытуға және стартап-жобаларды дамытуға бағытталған. Бүгінгі таңда 1317 IT-компания Astana Hub-тың қатысушысы саналады, оның ішінде 365-інің шетелдік үлесі бар. Олар материалдық инфрақұрылыммен қамтылған,  бизнесті дамыту бағдарламаларына қатысып, арнайы салықтық және визалық режимдерді пайдаланады, ақпараттық-білім беру қолдауына ие.

InDrive – штаб-пәтері АҚШ-тың Калифорния штаты Маунтин-Вью өңірінде орналасқан көлік саласындағы қызметтерді көрсететін жаһандық платформа. InDrive қосымшасын 175 миллионнан астам қолданушы жүктеген, әлемдегі көлік шақыру бағытындағы ең танымал екінші қосымша болып табылады. Бұдан бөлек, InDrive қалааралық қатынас және жүк тасымалы, курьерлік жеткізу және жұмыс іздеуді қамтитын қызметтер тізімін дамытып келеді. InDrive әлемнің 40-тан астам елінде бар.