«Шығыс» өңірлік қолбасшылығына қарасты 5518 әскери бөлімінің сарбаздары Өскеменнен Шемонайха қаласына дейін барып, қайта кері қайтты, деп хабарлайды Altainews.kz тілшісі.

«Шығыс» өңірлік қолбасшылығының баспасөз қызметінен хабарлағандай, 300 шақырымдық тактикалық-арнайы сабағына әскери бөлімнің 2023 және 2024 жылғы шақырылымның мерзімді әскери қызметшілері қатысты. Оқу-жаттығу барысында жас жауынгерлер өздерінің алған білімдерін іс жүзінде қолданып, қиян-кескі оқыс оқиғада техниканы басқарып, әртүрлі кедергілерді еңсеріп, шектеулі және ойық өтпелерден мүлтіксіз өтті.

– Ұлттық ұлан қатарына шақыртылғанда жауынгерлік техниканы басқарудан хабарсыз едім. Ұзақ қашықтықты қамтыған бүгінгі шеруден мол тәжірибе алдым. Жол қауіпсіздігін сақтай отырып, әскери техниканы діттеген жеріне жеткізу үлкен жауапкершілікті талап етеді, – дейді 5518 әскери бөлімінің қатардағы жауынгері Санжар Олжахан.

Ұлттық ұланның жас жүргізушілері тәжірибеде теориялық білімдерін шыңдап, әскери техниканы басқару қабілетін көрсетті, сондай-ақ жауынгерлік машинамен түрлі кедергілерді еңсерудің барлық мүмкіндіктерін жүзеге асырды. Алдағы уақытта 300 шақырымды еңсерген жас жауынгерлер әскери көліктерді басқаруға рұқсат алатын болады.

                                                                                                                                                      Нұржан Кенжеұлы