Бүгін Өскемендегі  «Алтай» көтерме-тарату орталығының аумағында Күршім мен Марқакөл аудандарының ауыл шаруашылығы өнімдері жәрмеңкесі өтті, деп хабарлайды Altainews kz тілшісі.

Өскеменде жыл сайынғы дәстүрлі сенбілік жәрмеңкелер өтіп жатыр. Осы сенбіде облыс орталығының тұрғындарына Күршім мен Марқакөл аудандарындағы шаруа қожалықтарының иелері, кәсіпкерлері өз өнімдерін қожетімді бағада ұсынды.

Сенбілік жәрмеңкеге келген облыс әкімінің орынбасары Ербол Нұрғалиев азық-түлік бағасын қалыпты ұстауда, өңірді жергілікті өніммен қамтамасыз етуде ауыл шаруашылығы жәрмеңкелерінің септігі көп екендігін айтты.

Күршім ауданының Құйған ауылынан келген жеке кәсіпкер Фарида Серікованың Өскемендегі жәрмеңкелерде балық өнімдерін саудалап жүргеніне 25 жыл болыпты. Кәсіпкер ауыл балықшыларынан сатып алған балығын өңдеп, ысталған балық, фарш жасап саудалап келеді. Күршімнен келген балық өнімдері жәрмеңкеге келушілердің көңілінен шығып, ел Ертістің балығын  көптеп сатып алып жатты.  Фариданың балық өнімдерінің тұрақты тұтынушылары Өскеменде ғана емес, Қарағанды мен Астана, Алматыда да бар.

Жәрмеңкеге асығып жеткен қала тұрғындары қаз-қатар тұрған сөрелерден сиыр, қой, жылқы етін де арзан бағамен сатып алды. Ауылдың жайлаудан түскен қоңды малының етін сатып алып жатқандардың қатары барған сайын көбейе түсті.

Марқакөл ауданының Боран ауылдық округінің әкімі Айдос Наурызбаевтың айтқанындай, марқакөлдік шаруа қожалықтарының иелері де Өскемендегі жәрмеңкеге мал етін молынан әкелген. Қалалықтар сиыр етінің келісін 2 300 теңгеден, «ауылдың дәмі» деп, майлы сүзбені 3000 теңгеден, сары майдың келісін 5000 теңгеден сатып алып жатты.

Жанаргүл Мұқатай