Қазгидрометтің ақпараты бойынша, 6 желтоқсанда облыстың солтүстігінде, шығысында жаяу бұрқасын соғып, көктайғақ болады.

Оңтүстіктен соғатын жел солтүстік-шығысқа ауысады, облыстың солтүстігінде, шығысында, оңтүстігінде күші 15-20 м/с жетеді, екпіні - 23-28, деп хабарлайды Altaynews.kz тілшісі.

Желтоқсанның 6-7 күндері  ауа температурасы -3 градустан -2 градусқа, облыстың солтүстігінде -5 градустан -10-15 градусқа, ал облыстың батысында -18 градус аязға дейін күрт төмендейді. Болжам бойынша бұдан да төмен болуы мүмкін.

Өскеменде 6 желтоқсанда көктайғақ пен жаяу бұрқасын күтіледі. Желдің екпіні 15-20 м/с дейін жетеді.

Осыған байланысты азаматтарға елді мекендерден тыс жерлерге барудан бас тарту ұсынылады.

Егер шығу қажет болса, автожолдардың жай-күйін нақтылаңыз. Көлікті жолға дайындаңыз. Өзіңізбен бірге байланыс құралдарын, қуаттайтын құралдар мен оларға қосалқы батареяларды алыңыз. Азық-түлік, сіріңке және жылы киім, қолшам, сондай-ақ жол бойындағы дәмханалардан шай құйып алуға болатын термосты қосымша алыңыз. Бензин қоры да жеткілікті болуға тиіс.

Төтенше жағдай кезінде 112 нөміріне хабарлаңыз.