Ұлттық ұланның  «Шығыс» өңірлік қолбасшылығына қарасты әскери бөлім жауынгерлері әскери құрылымдарға тиесілі техникаларды және  «D1»  санатындағы көлік  құралдарын  жүргізу куәлігіне қол жеткізді.

Әскери қызметшілерді арнайы санаттағы көлік құралдарын жүргізуге даярлау -  Өскемен қаласындағы 3477  әскери бөлімінің Дағдарысқа қарсы орталығында іске асады.  Мұнда ұландықтар  отыз күн бойы теориялық білім алса, келесі айда тәжірибелік сабақтарға қатысты, деп хабарлайды Altaynews.kz сайты.

Көлік жүргізуде  өрістерін кеңейтіп,  біліктіліктерін жетілдірген жауынгерлерге  тиісті құжатты  «Шығыс»  өңірлік  қолбасшылығы қолбасшысының техника және қару-жарақ жөніндегі орынбасары полковник Азамат Габдуллин табыстады.

Ұландықтарды арнайы санаттағы көлік құралдарын басқаруға даярлау Ішкі істер министрлігінің «механикалық көлік құралдарының  жүргізушілерін  даярлау қағидаларын бекіту»  туралы  №862  бұйрығының талаптарына сәйкес жүзеге асырылады. Еске салайық, 2022 жылы алғаш рет қолбасшылық қабырғасынан арнайы әскери техникаларды басқаруға даярлайтын заманауи оқу-материалдық база ашылған болатын.