Қылышын сүйрете жетер қыстың қаһары қос бүйірден қысқан кезде тас пен темірден жасалған коммуналдық инфрақұрылым жүйесіне түсетін жүктеме айтарлықтай артатыны ақиқат. Жыл өткен сайын беріктігі сыналар ескі инженерлік желілер үшін бұл кезеңнің салмағы ауыр. Күні кеше Өскемен қаласында Целинная көшесіндегі №2 үй маңында, Мирный кентіндегі 1964 жылы салынған диаметрі 400 миллиметрлік болат су құбырында жарылыс болды. Жауапты қызметтердің жедел әрі үйлесімді әрекетінің арқасында су беру қызметі қысқа мерзім ішінде толық қайта қалпына келтірілді, деп хабарлайды Altainews.kz тілшісі.

Апат салдарынан су жолдың жүріс бөлігіне шығып, Целинная, 2 мекенжайындағы жеке тұрғын үйдің ауласын ішінара басты. Оқиға орнына жедел жеткен мамандар суды тоқтатып, жер қазу жұмыстарына кірісті. Қысқа уақыт ішінде құбырдың зақымданған бөлігі толықтай ауыстырылды. Қалпына келтіру жұмыстарының барысын Шығыс Қазақстан облысының әкімі Нұрымбет Сақтағанов өзі барып бақылап көрді.

Ең қатты аяз сенбі мен жексенбі күндеріне тұспа-тұс келіп, осы кезеңде қалада бірден екі жағдай тіркелді. Ал –38 градусқа дейін төмендеген ауа температурасы жөндеу жұмыстарын едәуір қиындатты.

Аймақ басшысы апатты жоюға қатысқан жұмысшылармен тілдесіп, жауапты органдарға оларды ыстық тамақпен қамтамасыз етуді, сондай-ақ төтенше жағдай кезінде атқарылған еңбек үшін қосымша үстемақы төлеу мәселесін қарастыруды тапсырды.

Фото: Жібек Нұрахмет 

Видео: Жәнібек Ырысбай