Облыс тұрғындары үнемі өз бастамаларымен сенбіліктер өткізіп, белсенділік танытып келеді. Айталық, бүгін Глубокое ауданында «Таза Қазақстан» акциясы аясында «Таза бұлақ – таза аумақ» ұранымен кезекті сенбілік өтті, деп хабарлайды Altainews.kz тілшісі.

Акцияға қатысушылар Глубокое кентінің Киргородок шағын ауданындағы жағажай аумағын абаттандырды.

Балаларға арналған ойын алаңқайлары және белсенді өмір салтын сүйетіндер үшін футбол, волейбол, теннис алаңдары салынды.

Айта кету керек, облыста «Таза Қазақстан» экологиялық акциясының жоғары тиімділігі үшін «Экосақшы» жобасы басталды. Бірінші эко-тур Самар ауданында өтті, онда Самар ауданының ауылдық округтерінен тағайындалған экопатрульдерді оқыту семинары ұйымдастырылды. Соңында ауданның экосақшылары және «Жасыл ел» еңбек жасақтарының мүшелері, волонтерлер Бұқтырма су қоймасының жағасында сенбілік өткізді.

Жыл басынан Шығыс Қазақстан облысында 204 саябақ пен сквер, 323 тарихи-мәдени ескерткіш, 859 әлеуметтік нысан ретке келтірілді. 6,8 мың су нысаны, 26 субұрқақ, 348 км арық тазартылды. Елді мекендерден 29 мың тонна қоқыс шығарылды.

Қазір өңірде 42 көппәтерлі тұрғын үйдің қасбеттерін жөндеу және муралдар салу жұмыстары жүруде. Іс-шаралар елдімекендерге бірыңғай сәулеттік келбет беруге бағытталған.