Он жыл бойы қымбаттамаған пойыз бағасы жөндеу-жаңарту үшін көтерілмек
1 қазаннан бастап пойыз билеттері 20 пайызға қымбаттайды. Теміржол тарифін өсіру арқылы теміржол паркін жаңарту көзделген, деп хабарлайды Altaynews.kz тілшісі.
Қазіргі кезде жолаушыларға кез келген көлік қатынасында жайлылық керек. Бұл жайлылықты қамтамасыз ету үшін теміржол тарифі көтеріледі. Бұл туралы ҚР Көлік министрі Марат Қарабаев Өскеменге келген жұмыс сапары барысында айтты.
- Теміржол билеттерінің бағасы 10 жыл бойы көтерілмей тұрды. 10 жыл ішінде жанармай бағасы да, көмір бағасы да өсті. Қазіргі билет құны пойыз шығындарының 30%-ын ғана жабады. Мемлекет теміржол қызметіне жыл сайын 120-125 млрд теңге субсидия береді. Мемлекеттің қаржысы ол, әрине, салық төлеушілердің қаржысы, - деді ҚР Көлік министрі.
Билет бағасы өскенімен, мемлекет субсидия көлемін азайтпайды. Ал билет құнынан түскен қаражатқа жолаушыларға жайлы сервис қамтамасыз ету үшін жаңа пойыздар сатып алуды жоспарланған.
- Бізде қазір 2067 тасымалдаушы пойыздар болатын болса, оның 28%-ы ескірген, ішінде кондиционері де, басқасы да жоқ. Келесі жылдан бастап жаңа вогондарды жаңартып бастаймыз. Жалпы алдағы 5 жылдың ішінде түскен қаржыға біз 250-дей жаңа вагон сатып алатын боламыз, - деп қосты министр Марат Қарабаев. - Бір сұхбатымда мен 2026 жылы жайлы вагондарға қол жеткіземіз деп айтқанмын. Бірақ 2026 жылы біз тек дефицитті жабатын болып тұрмыз. Жалпы ескі вагондарды 2029 жылға дейін жаңартып, ескілерін қолданыстан шығарамыз.
Айта кету керек, 1 қазаннан бастап Қазақстанда теміржол билеттерінің құны 20%-ға қымбаттайды.
Ақерке Рағызбаева
Оқи отырыңыз
