Облыс орталығындағы «Алтай» көтерме-бөлшек сауда орталығының аумағында «Туған жер - алтын бесігім!» жобасының аясында Зайсан ауданының ауылшаруашылық жәрмеңкесі өтті, деп хабарлайды Altainews.kz тілшісі. 

Дәстүрлі сенбілік жәрмеңкеге қатысқан Зайсан ауданының аграрлары өздерінің құнарлы, әрі табиғи таза өнімдерін қала тұрғындарына ұсынды. Ет, сүт өнімдері, түрлі дақылдар, нан мен кондитерлік өнімдер сияқты тағы да басқа сапалы тауарлардың бағасы қолжетімді болғандықтан, сұраныс та жоғары болды. Сондықтан таң ата бұл жерге ағылған жұрт арзан өнімдерді көптеп алуға тырысты. Қалалықтар бағаның көңілден шығатынын айтып та жатыр.

Мәселен, жылқы мен сиыр етінің келісі 2400 тг-ден, ал қойдың еті 2100 тг-ден саудаланды. Өзге де өнімдердің бағасы нарықтағыдан әлдеқайда төмен болды. Сондықтан сатушылардың саудасы қызды. Бұл өз кезегінде, отандық өнім өндірушілерге де үлкен қолдау. Қарабұлақтан өз өнімдерін саудалауға келген Бақытқан Семсерхан тұрғындар жылқы етін, қазыны, сондай-ақ, тарыны таласа алып жатқанын алға тартты.  Айтуынша, әсіресе, жылқы еті жақсы өтіп жатыр. Көптеп алып жатқандармен саудаласып, бағасын бұдан да түсіріп сатып жатқан жайы бар екен. 

Жәрмеңкеге сиыр мен қойдың, жылқының еті мен басқа да түрлі азық-түлік тауарлары көптеп жеткізілген. 

Осы орайда ауылдастарына қолдау көрсетуден шет қалмаған аудан өнерпаздарының концерттік бағдарламасы жәрмеңкені қыздырып, келушілерге көтеріңкі көңіл-күй сыйлады.

Атап өтелік, қазіргі уақытта облыстық әкімдік тарапынан бағаны тұрақтандыру мақсатында бірнеше бағытта жұмыс атқарылуда. Соның бірі осы, отандық өнім өндірушілерінің жәрмеңкесі. Қала тұрғындарының көпшілігі сенбі сайын өтетін осындай жәрмеңкелерге келуді әдетке айналдырған. Өйткені мұнда өнім делдалсыз, үстеме баға қосылмастан өндірушіден бірден тұтынушыға жетеді. Осылайша, облыс орталығында апта сайын өтетін жәрмеңке әлеуметтік маңызы бар азық-түлік тауарларының бағасын тұрақтандырып, жергілікті халықты сапалы және табиғи азық-түлікпен қамтамасыз етуге оң әсер етіп келеді.

Арайлым Нығметоллақызы