2025 жылы Шығыс Қазақстан облысында жаңа әуежайлар салу жоспарланып отыр. Биыл Зайсан мен Қатонқарағайдағы әуежайлардың құрылысы басталады. Бұл жобалар өңірдің көлік-логистикалық инфрақұрылымын дамытуға және туризмді жандандыруға бағытталған,- деп хабарлайды Altainews.kz тілшісі ҚР Көлік министрлігіне сілтеме жасап.

Қазіргі уақытта құрылысқа қажетті жер учаскелері рәсімделіп, жобалау жұмыстары жүргізіліп жатыр. Жаңа әуежайлар халықаралық стандарттарға сай, заманауи технологиялармен жабдықталып, аймақтардың қолжетімділігін арттырады.

Қатонқарағай табиғи сұлулығымен және ұлттық паркімен танымал болса, Зайсан – бай тарихы мен ерекше табиғи ресурстарымен туристерді қызықтыратын орын. Әуежайлардың ашылуы бұл өңірлерді халықаралық және ішкі туристер үшін тартымды етеді.

Бұл бастама өңірдің әлеуметтік-экономикалық дамуына, халықтың өмір сапасын жақсартуға және Қазақстанның туризм индустриясын жаңа деңгейге көтеруге септігін тигізеді.