Өскемен қаласында креативті индустрия саласында еңбек ететін медиа тұлғалар арасында алғаш рет волейболдан «Shygys Madeniet Turnir» атты аймақтық турнир өтуде. Жарысты Шығыс Қазақстан облыстық филармониясы облыстық мәдениет басқармасы мен спорт басқармасының қолдауымен ұйымдастырды, деп хабарлайды Altainews.kz тілшісі.

Спорттық шараға облыс орталығы мен аудан-қалалардан келген 100-ден астам өнер иесі – асабалар, әншілер, фотографтар, мобилографтар, театр студияларының өкілдері мен мәдениет қызметкерлері қатысты.

Турнирдің басты мақсаты – шығармашылықпен айналысатын, бірақ ресми тіркелмеген өзін-өзі жұмыспен қамтушыларды жеке кәсіпкер ретінде заңдастыру қажеттігін түсіндіру.

Турнирдің келесі кезеңінде қатысушылармен дөңгелек үстелдер мен түсіндіру жұмыстарымен жалғасын табады. Ал 13 мамыр күні филармония сахнасында «Шоумен FEST» өтеді. Онда үздік шоумен анықталып, 500 000 теңге көлемінде сыйақы табысталады.

Филармония директорының орынбасары Дәурен Әбенов шараның аймақтық шығармашылық қауымдастық үшін маңызын атап өтті.

Шараға қатысу үшін үміткерлер жеке кәсіпкер ретінде тіркелген. Бұл – ұйымдастырушылардың басты шарттарының бірі болды. Турнир тек спортпен шектелмей, шығармашылық орта үшін жаңа кәсіби байланыстар орнататын алаңға айналды.

Жарыс қорытындысы бойынша жеңімпаздар кубок және алғыс хаттармен марапатталды. Қаржылай жүлде қарастырылмаған. Ұйымдастырушылардың айтуынша, басты мақсат – шығармашылық қауымдастықтың ынтымақтастығын нығайту.

Айта кетейік, шараны өткізуге қалалық әкімдік пен облыстық спорт басқармасы қолдау білдіріп, спорт алаңы, жабдықтар және кәсіби төрешілермен қамтамасыз етті.