1 мамыр – Қазақстан халқының бірлігі, ынтымағы күні. Қазіргі уақытта елімізде жүзден аса ұлт пен ұлыстар тұрады. Барлығы бір шаңырақтың астында береке мен бірлікте тату-тәтті ғұмыр кешуде. Әрқайсысы Қазақстан Республикасының Ата Заңы негізінде Отанына айналған қазақ еліне қызмет етуде. Айтулы мерекеге орай, тыныс-тіршілігімізбен қоса, іс-әрекеттерімізбен біте қайнасып кеткен бірнеше ұлт өкілін әңгімеге тартқан едік, деп хабарлайды  Altainews.kz тілшісі. 

Өскемен қаласындағы «Кавказ» ансамблінің негізін қалаушы және көркемдік жетекшісі, облыстық және республикалық байқаулардың лауреаты Жамал Әскеров, өңіріміздегі әзірбайжан этносы өкілдерінің өмір салты мен әдет-ғұрпы, төл мәдениеті туралы сыр шертті.

 Айтуынша, балалары өз ана тілдерін әсте ұмытқан емес. Қазақ, орыс тілдерімен қатар меңгерген. Жамалдың өзі көп жылдар бойы «Достық үйі  –  қоғамдық келісім орталығындағы» әзірбайжан этномәдени бірлестігіне жетекшілік еткендіктен, өмірде де, өнерде де басқа ұлт өкілдерімен етене жақын араласып, сыйласып кеткен. 

 Айта кетейік, Жамал Әскеров құрамында қазақтар, орыстар, әзірбайжандар, армяндар мен шешендер, татарлар, сондай-ақ, пәкістандықтар, түріктер мен өзбектер, яғни 12-ден астам жергілікті ұлт өкілдерінен тұратын, облыстық және республикалық, халықаралық фестиваль жеңімпаздары – «Кавказ» лезгинка мектебінің негізін қалаушы және көркемдік жетекшісі. Аталмыш лезгинка мектебі 2012 жылдың 5 наурызында ашылған. Бүгінгі таңда ансамбльдің 65-тен астам мүшесі бар. Негізгі зал облыстық Пушкин атындағы кітапхана маңайында орналасса, ал «ЖМК» ауданы, Защита, Согра, Аблакетка сияқты шағын аудандарда, сондай-ақ, Қасым Қайсенов кентінде филиалдары жұмыс істейді. Бұл күнде тау халықтарының танымал биіне қызығып, үйренуге құлшыныс білдірген 400-ге жуық шәкірт бар екен. 

Осылайша, Жамал Әскеров барша жұртты 1 мамыр – Қазақстан халқының бірлігі күнімен шын жүректен құттықтап, жылы лебізін білдірді.

Бүгінгі таңда елімізде тұратын барлық ұлт пен ұлыс өкілдері бірлігі мен ынтымағы жараса тұрмыс кешуде. Олардың тілі басқа болғанмен, тілегі бір, жүзі басқа болғанмен, жүрегі бір. Осындай жандар арасында бір-бірімен көңілі жарасқан интернационалды отбасылар да аз емес. Сондай кішкентай мемлекеттің бірі – Аян мен Лина Қабышконовтардың отбасы. Олар Үлкен Нарын ауданына қарасты Солдатово ауылының тұрғындары. Линаның ұлты – татар. Мектепте ағылшын тілінен сабақ береді. Ал жолдасының өз кәсібі бар. Қазіргі уақытта жас отбасы бес жасар Ильнур есімді ұл өсіріп отыр.  

Айтуынша, өзі туып-өскен отбасы қазақ-орыстармен біте қайнасып кеткендіктен, татар ұлтына тән кейбір салт-дәстүрлер ұмытыла бастаған. Сонда да Лина халық әндерін тыңдап, әрі тәтті бәліш пісірген кезде, өзінің ұлттық болмысын жақсы сезінетінін айтады. Жақындарына татар халқының хош иісті, әрі дәмі тіл үйіретін эчпочмак, чак-чак сияқты ұлттық тағамдарын әзірлеп беруді ұнатады екен. Өз ана тілін жақсы білмесе де, ұлтын мақтаныш тұтады. 

Ол бос уақытында кітап оқып, шығармашылықпен айналысады. Бұған қоса ауданның қоғамдық-мәдени өмірінен де шет қалған жоқ. Оны ауылдар мен аудан орталығында өтетін мерекелік іс-шараларға жүргізуші болуға жиі шақырады.  

Сөз соңында Лина барша жұртты 1 мамыр – Қазақстан халқының бірлігі күні мерекесімен құттықтап, әрбір жанға саулық, отбасына амандық, мол жақсылық пен құт-береке тіледі.

Өскеменде тұратын тағы да бір интернационалды отбасы – көпбалалы Джошгун Алтыевтың отбасы. Джошгун мен Дамираның шаңырақ құрғандарына 10 жылдан астам уақыт болды. Бүгінгі таңда олар бес баланың ата-анасы атанып, ұл-қыздарын тәрбиелеп отыр. Айтуларынша, интернет желісі арқылы танысып, үйленген. Джошгунның ұлты – түркімен. 

Ол Джошгунның еті тірі, шаруаға епті екенін алға тартты. Бұл күнде ойға алған әр істің берекесін кіргізіп, отбасын асырап жүрген жайы бар екен. Қазақ тілін де жақсы меңгеріп алыпты. Сондай-ақ, Дамира жолдасының сыртқы түр-келбетімен ерекшеленетіні болмаса, ішкі болмысымен қазақ азаматтарынан еш айырмашылығы жоғын айтады. Ал интернационалды отбасында туған балалар, шыққан тектерін ұмытпай, екі халықтың да мәдени құндылықтарын бойға сіңіріп өсіп келеді.  

Бүгінде еліміздегі әрбір ұлтқа салт-дәстүрлерін жаңғыртып, мәдениеті мен әдебиетін дамытуға, өз тілін емін-еркін меңгеруге қамқорлық көрсетілуде. Осының бәрі қоғам¬дағы азаматтық ынтымақтастық пен ішкі саяси тұрақтылықты сақтау жолында стратегиялық бағыттың дұрыс екенін көрсетіп, мемлекет тарапынан ұлтаралық қатынастарды реттеуге қолайлы жағдай жасалуының арқасында жүзеге асып отыр.