Шығыс Қазақстанда соңғы он жылда қылмыс деңгейі біртіндеп төмендеп келеді. Дегенмен биыл интернет-алаяқтық 30 пайызға, ал жасөспірімдер арасындағы қылмыс 23 пайызға өскені тіркелген. Бұл деректер облыста өткен «Заң және тәртіп: өзара іс-қимыл басымдықтары және қоғамдық қауіпсіздікті күшейту» атты кеңейтілген отырыста айтылды, деп хабарлайды  Altainews.kz тілшісі.

Кеңес жұмысына облыс әкімі Нұрымбет Сақтағанов, құқық қорғау органдарының басшылары, үкіметтік емес ұйымдар, бизнес өкілдері және белсенді азаматтар қатысты.

Облыс прокуроры Алмат Байшолақовтың айтуынша, өңірде заңдылықты сақтау мен қылмыстың алдын алу бағытында жүйелі жұмыстар жүргізілуде. Нақты нәтижелер де бар.

Оның айтуынша, қаржылық қылмыстардың алдын алу үшін өңірде жаңа құрылымдар жұмыс істей бастады.

Алайда, интернет-алаяқтық фактілері азаймай тұр. Былтыр осы кезеңде 573 интернет-алаяқтық қылмысы тіркелсе, биыл олардың саны 743-ке жетті.

Жиында жасөспірімдер қылмысының да артып отырғаны айтылды. Құқық қорғау органдарының өкілдері бұл бағытта мектептер мен жастар ұйымдарының көмегіне сүйену қажет екенін алға тартты.

Басқосу барысында №39 мектептің оқушысы Әлия Жеңісбекова «Мектепке қауіпсіз жол» жобасын таныстырса, Самар ауданынан келген оқушылар «Қауіпті нысандардың бірыңғай электронды картасы» жобасын ұсынды. Мұндай бастамалар жастардың қоғамдық қауіпсіздікке бейжай қарамайтынын көрсетті.

Кеңес отырысында облыс әкімі Нұрымбет Сақтағанов Мемлекет басшысының Ұлттық Құрылтайдағы сөзіне тоқталды.

Облыс басшысының айтуынша, заң мен тәртіп қағидаты – елдегі тұрақтылықты, азаматтардың қауіпсіздігін қамтамасыз ететін басты тетік. Бұл – құқық қорғау органдарына үлкен жауапкершілік жүктейді.

Сондай-ақ, облыста құқық қорғау саласын қолдауға бөлінетін қаражат көлемі жыл сайын артып келеді.

Биыл өңірде нашақорлыққа қатысты қылмыстар азайғанымен, жасөспірімдер арасындағы құқықбұзушылық көбейгені байқалып отыр. Бұл – қоғам мен құқық қорғау органдары бірлесе отырып, ерекше назар аударатын мәселе.

«Әділетті Қазақстан» қағидатын жүзеге асыру жолында басты міндеттердің бірі – елдегі қоғамдық қауіпсіздікті қамтамасыз ету. Құқық қорғау органдары бұл бағытта жастармен, мектептермен, оқу орындарымен және қоғамдық ұйымдармен тығыз жұмыс жүргізудің маңыздылығын атап өтуде. Мамандардың айтуынша, қоғамдағы әр азамат заң мен тәртіпке құрметпен қарап, жастар арасында құқыққа қарсы әрекеттердің алдын алуға белсенді атсалысса, қауіпсіз әрі әділетті орта қалыптастыруға болады.

Фото: Махаббат Ахметжанова